الزيارة الثــــــــانية

السلام عليكم ورحمة الله وبركاته

بالطبع انا اتأخرت في سرد تفاصيل الزيارة الخاصة بيوم العيد بس ده بسبب الامتحانات وربنا ييسر بس و تخلص عشان الواحد يروق باذن الله

خرجنا يوم العيد الصبح وللاسف اتأخرنا شوية ضغيرين فسافرنا على الساعة سبعة وللاسف مقدرناش نصلي العيد

المهم وصلنا القاهرة على الساعة 8 وربع بس للاسف توهنا شوية في الطريق لان السواق مكنش عارف المكان بس الحمد لله وصلنا في الاخر

وبفضل الله ان الطريق كان رايق جدا

المهم وصلنا حوالي الساعة 9 الا ربع وكان المكان زحمة جدا فعلى ما دخلنا وتم اخذ البطاقات الشخصية منا لتسجيل الاسماء كانت الساعة حوال تسعة

بعدين روحنا لنفس الكافتيريا لانتظار الطفطف وطبعا كان فيه جيوش هناك واعداد رهيبة يعني الركوب هيكون بالدفع الذاتي

المهم بعد كل الزحمة دي فوجئنا بإن الطفطف معطل وانه ممنوع اننا نروح مشي يعني لازم نركب

فكان ايه الحل ؟؟؟؟

اننا هنركب عربية الترحيلات الزرقاء الكبيرة دي :)

بالفعل ركبناها

طبعا عربية من جوة شكلها كئيب جدا

بصراحة حاجة مهينة جدا

المهم وصلنا للمزرعة نزلنا من العربية لقينا زحمة كتير جدا

بس سبحان الله مجرد ما رحت سجلت اسمي مع الراجل اللي بيسجل الاسماء قاللنا ادخلوا

وتقريبا اتضح ان الجنائيين هما اللي منتظرين برة انما السياسيين بيدخلوا علطول

دخلنا لقينا بابا منتظرنا جوة بس للاسف المكان كان زحمة بطريقة رهيبة يعني الواحد ميعرفش يتحرك خالص

وماشاء الله محسسين بعض بجو العيد ومهيصين خالص يعني مش بيحسسونا خالص انهم معتقلين

خلصنا الزيارة على الساعة 2 ونص كدة عشان الموظفين كانوا تعبانين وعاوزين يروحوا لانهم مناموش من يومين ففعلا شكلهم مرهق خالص

والحمد لله مر اليوم على خير